കൊടുവഴങ്ങ പഴംതോട് നവീകരണം – ശ്രദ്ധക്ഷണിക്കൽ സായാഹ്നം സംഘടിപ്പിച്ചു
കഴിഞ്ഞ 20 വർഷത്തിലേറെയായി തങ്ങൾ കണ്ട സ്വപ്നത്തെ, 2011ൽ ശ്രീ നാരായണ ക്ലബ് & ലൈബ്രറി തുടങ്ങിവച്ച ശുചീകരണ പ്രവർത്തനങ്ങൾ, നബാർഡിന്റെ 3 കോടിയോളം രൂപയുടെ പദ്ധതി ഇന്ന് നിർമ്മാണ പൂർത്തീകരണത്തിലേക്കു കടക്കുമ്പോൾ, അതീവ ശ്രദ്ധാലുക്കളായി കൊടുവഴങ്ങയിലെ സാമൂഹ്യ പ്രതിബദ്ധതയുള്ള ജനത പഴംതോടിന്റെ ഓരത്തു ഒത്തു ചേർന്നു. നാടിന്റെ മുഖച്ഛായ തന്നെ മാറ്റുന്ന ഈ നിർമ്മാണ പ്രവർത്തനത്തിലെ അപാകതകൾ ചൂണ്ടികാണിക്കുവാൻ. പുതിയ നിർദ്ദേശങ്ങൾ അവതരിപ്പിക്കുവാൻ. എല്ലാത്തിലുമുപരി തങ്ങളുടെയെല്ലാം ബാല്യകാലത്തെ മധുരിക്കുന്ന സ്മരണകൾ ഇരമ്പുന്ന ഈ തണ്ണീർത്തടത്തെ സംരക്ഷിക്കുവാൻ. കൊടുവഴങ്ങയുടെ സാംസ്‌കാരിക ജ്വലനമായ ശ്രീനാരായണ ക്ലബ്ബ് & ലൈബ്രറി സംഘടിപ്പിച്ച “പഴംതോട് നവീകരണം ശ്രദ്ധ ക്ഷണിക്കൽ സായാഹ്നം” ജില്ലാ ലൈബ്രറി കൌൺസിൽ പ്രസിഡന്റ് ശ്രീ പി. ആർ. രഘു ഉത്ഘാടനം നിർവഹിച്ചു. ആലങ്ങാട് ഗ്രാമപഞ്ചായത് വൈസ് പ്രെസിഡന്റ്‌ ശ്രീ. കെ. എൻ. ഉണ്ണി അദ്ധ്യക്ഷത വഹിച്ച യോഗത്തിൽ ലൈബ്രറി സെക്രട്ടറി ശ്രീ. ടി. വി. ഷൈവിൻ സ്വാഗതം ആശംസിച്ചു. ലൈബ്രറി പ്രസിഡന്റ് ശ്രീ. വി. ജി. ജോഷി പ്രവർത്തനങ്ങളിലെ അപാകതകൾ വിശദീകരിച്ചു. പഴംതോട്ടിൽ അടിഞ്ഞുകൂടിയിട്ടുള്ള ചളിയും മറ്റു മാലിന്യങ്ങളും നീക്കം ചെയ്തു മറ്റു അപാകതകൾ പരിഹരിച്ചതിനുശേഷവും മാത്രം വേലി കെട്ടി നവീകരണ പ്രവർത്തനം പൂർത്തീകരിച്ചു എത്രയും വേഗം നാടിനു സമർപ്പിക്കണം എന്നു യോഗത്തിൽ ആവശ്യപ്പെട്ടു. എല്ലാ വർഷവും പുതുവത്സരത്തിൽ ഗ്രാമ പഞ്ചായത്തിന്റെ നേതൃത്വത്തിലും ലൈബ്രറിയുടെ ആഭിമുഖ്യത്തിലും സാംസ്ക്കാരികോൽസവം സംഘടിപ്പിക്കണം എന്ന അഭിപ്രായവും യോഗത്തിൽ ഉയർന്നു വന്നു. വാർഡ് മെമ്പർമാരായ അജ സാബു, ജോസ് ഗോപുരത്തിങ്കൽ, റൂബി ജസ്റ്റിൻ എന്നിവരും, മുൻ പഞ്ചായത്ത് പ്രസിഡന്റ് ടി. യു. പ്രസാദ്, മുൻ മെമ്പർമാരായ എം. ആർ. രാധാകൃഷ്ണൻ, ലത പുരുഷൻ, കൂടാതെ ടി. വി. മോഹനൻ, കെ. ഇ. അശോകൻ, ബി. സുഗതൻ എന്നിവർ സംസാരിച്ചു. ആലങ്ങാട് സഹകരണ ബാങ്ക് പ്രസിഡന്റ് ശ്രീ. സി. എസ്. ദിലീപ് കുമാർ നന്ദി പറഞ്ഞു.
